Ўзбекистон Россияга 50 мингдан зиёд меҳнат мухожири жўнатмоқчи
© Sputnik/ Павел Лисицын
Спутник нашри маълуолтига кўра, ўтган йил 21 декабр куни Ўзбекистон ва Россия ўртасида Россия Федерацияси ҳудудида вақтинча меҳнат қилиш учун Ўзбекистон фуқароларини уюшган ҳолда танлаб олиш тўғрисида имзоланган келишув кучга киргани шундай имконият яратган.
Ўзбекистон Республикасининг Бандлик ва меҳнат муносабатлари вазири ўринбосари Зокир Умаров нашр мухбири билан сухбатда Ўзбекистон Россияга кўпроқ меҳнат мухожири жўнатиш имкониятига эга эканини айтган.
“Биз Ташқи меҳнат миграцияси масалалари бўйича агентлик орқали Россияга 50 мингдан зиёд мухожир жўнатишни режалаганмиз. Бу фақат бизнинг агентликка тааллуқли. Агар бу йил меҳнатга жалб этиш ҳақида қонун қабул қилинса, хусусий ширкатлар орқали кўпроқ одам ёллаб, уюшган тартибда Россияга жўнатиш имкониятига эга бўламиз”, - дейди вазир ўринбосари.
Бандлик ва меҳнат муносабатлари вазирлиги маълумотига кўра, ўтган йил Россияга 922 нафар меҳнат муҳожири жўнатилган.
Россия Ички ишлар вазирлиги маълумотига кўра, 2017 йилнинг январ – сентябр ойларида 3 миллион 100 мингдан ортиқ Ўзбекистон фуқароси РФ миграция идораси томонидан рўйхатга олинган.
Россия Марказий банки ҳисоботига кўра, айни даврда Россиядан Ўзбекистонга пул ўтказмалари 2 миллиард 600 миллион АҚШ долларини ташкил этган.
Бу 2016 йилнинг шу даврига нисбатан 31 фоизга кўп. Шу кунга қадар Ўзбекистон фуқароларининг аксари Россияга ишлаш учун ноқонуний тарзда, уюшмаган ҳолда Қозоғистон орқали кетган.