Германия ИИ вазири: “Ислом дини Германияга тегишли эмас”
© Reuters
Германия Ички ишлар вазири этиб тайинланган Хорст Сийхофер “Ислом дини Германияга тегишли эмаслиги”ни айтиб, мигрантларга нисбатан кескин чоралар кўрилишини таъкидлади.
14 март куни янги Ички ишлар вазири сифатида қасамёд қилган Хорст 16 март куни Bild газетасида чоп этилган илк интервьюсида “мигрантларни мамлакатдан тезроқ чиқариб юбориш” ҳақидаги режани ҳукуматга тақдим этишини билдирди.
“Бу ерда биз билан бирга яшайдиган мусулмонлар Германияга тегишли. Бу, насронийлик билан чамбарчас боғлиқ бўлган Германия ўз анъана ва урф-одатларидан воз кечиши кераклигини англатмайди. Айтмоқчи бўлган гапим шуки, мусулмонлар ёнимизда ёки бизга қарши эмас балки, биз билан бирга яшаши лозим”, - дея таъкидлаган Хорст Сийхофер.
Унинг ушбу баёноти Канцлер Ангела Меркел айтган гапларга мутлақо зиддир.
Меркел хоним, “Германия насронийлик ва яҳудийлик билан чамбарчас боғлиқ бўришига қарамай, мамлакатда тўрт миллиондан ортиқ мусулмон яшайди. Улар Германияга тегишли ва ўз динларига эътиқод қилишади”, деган эди.
Ички ишлар вазири, қочқинларни камайтириш учун улар келган қатор давлатлар “хавфсиз” деб таснифланишини, шундан сўнг бошпана берилмаган мигрантларни ватанларига депортация қилиш осонроқ бўлишини сўзига қўшимча қилди.
Германия ҳукумати маълумотига кўра, ҳозир мамлакатда 4,4 – 4,7 миллион мусулмон яшайди. Уларнинг аксарини турклар ташкил этади.
Канцлери Ангела Меркел юритган “очиқ эшиклар” сиёсати туфайли 2015 йилда Яқин Шарқ ва бошқа минтақалардан бир миллиондан ортиқ мусулмон қочқин Германияга кириб келган эди.