Британия ИШИДга қарши кибер уруш бошлади
GCHQ разведка агентлиги директори Жереми Флеминг Британия ИШИДга қарши кибернетик ҳужум амалга оширганини маълум қилди.
БиБиСи хабарига кўра, MI 5 махсус хизматининг собиқ агенти бўлган Флеминг 12 апрел куни Манчестер шаҳрида иш бошлаган “Кибер Британия” анжуманда сўзлаган нутқида ўз мамлакати террорчи гуруҳга қарши кенг кўламли кибер ҳужум уюштирганини айтди.
“2017 йилда ИШИД ўз нафрати, қарашлари ва ташвиқотларини Интернет орқали тарқатишига имконият топа олмаган пайтлар бўлди”, - дея таъкидлаган Жереми Флеминг.
Унга кўра Британиянинг кибер амалиётлари асосан ИШИДнинг Интернетдаги тарғиботига қаратилган бўлиб, террорчи гуруҳнинг тармоғи ва ускуналари яроқсиз ҳолатга келтирилган.
Жереми Флеминг кенг кўламли операциянинг аксар қисми махфий бўлгани боис мавзу тафсилотлари ҳақида батафсил сўзлаб бера олмаслигини айтган.