АҚШ президентига пойафзалини отган журналист Ироқ парламенти аъзолигига номзод бўлди
АҚШ президенти Жорж Бушга пойафзалини отган ироқлик журналист Мунтадир Ал-Заиди 12 май куни мамлакат парламенти учун ўтказиладиган сайловда иштирок этади.
Унинг номзоди Ироқда катта таъсирга эга бўлган шиа уламоси Муқтадо Садр етакчилигидаги партия томонидан илгари сурилган.
Жаноб Заиди ўзининг сайловолди дастурида ироқликларга коррупцияга барҳам беришни ваъда қилган.
2008 йил 14 май куни Ироққа ташриф буюрган АҚШ президенти Жорж Буш ва Ироқ Бош вазири Нури Ал-Малики Бағдодда матбуот анжумани ўтказаётган пайтда, АҚШнинг Ироқда юритаётган сиёсатидан кескин норози бўлган журналист Мунтадир ал-Заиди пойафзалини ечиб АҚШ президентига отганидан кейин у ироқликлар орасида миллий қаҳрамонга айланган эди.
Хориж давлати раҳбарига ҳужум қилганликда айбланиб 12 ойга қамоқ жазосига ҳукм қилинган Мунтадир Ал-Заиди 9 ой ўтиб қамоқдан чиққан.
Озод бўлганидан кейин Заиди қамоқда Ироқ расмийлари ва қамоқхона нозирлари уни қийноққа солганини, тиши, бир нечта суяги синганини ва яна бошқа тан жароҳатлари олганини иддао қилиб даволаниши кераклигини айтган.
Мунтадир Ал-Заиди пойафзалини ечиб АҚШ президенти Жорж Бушга улоқтирган пайтда у Ал-Бағдодия телеканалида мухбир бўлиб ишлаган.