«Жаноб Президент! Файзу баракот-ла Рамазон келди»
Қувайт телекомнинг “Заин” ширкати томонидан ишланган охирги Рамазон телерекламаси бир нафар ёш ўғил бола дунёнинг энг қудратли лидерлари, жумладан, АҚШ президенти Доналд Трамп, Россия президенти Владимир Путин ва Германия канцлери Ангела Меркелга ўхшаш одамларга қўшиқ орқали қилган мурожаати акс этган.
Биринчи эпизодда ёш ўғил бола АҚШ президенти Доналд Трампга “Файзу баракотли” Рамазон келганини айтиб, “Вайрона уйимни топсангиз”, деб уни ўз уйига ифторликка таклиф этади.
Кейинги эпизодларда умидсиз боланинг ҳаётига таъсир этган дунёнинг қатор лидерлари, хусусан, жаноб Путиннинг айримлари мажруҳ бўлиб қолган болаларнинг оила аъзолари билан ўтириб бирга овқатлангани акс этган.
Бошқа бир эпизодда Меркел хоним пуфланган резина қайиқ тўла уруш қочқинлари денгиз орқали Европа қирғоғига базўр етиб келган пайтда улар орасидаги бир болани кўтариб олгани тасвирланган.
“Заин” ширкати ишлаган Рамазон телерекламасининг кейинги эпизодида Мянмада озчиликни ташкил этган роҳинжа мусулмонлари мамлакат ҳарбийлари уюштирган қатағондан жон сақлаш мақсадида ўрмон ва дарёларни кесиб қўшни давлатлар томон кетаётган пайтда БМТ Бош котиби Антонио Гутерреш қочқин болалардан бирини кўтариб бағрига босгани кўрсатилган.
Сўнгги лавҳада ёш бола озодликдан маҳрум қилинган қизчани кўриш учун қамоққа боргани акс этган.
Афтидан, бу эпизодда Исроил саккиз ойга қамоқ жазосига ҳукм қилган 17 яшар фаластинлик фаол қиз Аҳед Ал-Тамими тақдири акс этган. Эпизодда ёш бола қамоқхона камераси қулфини болға билан уриб бузганидан сўнг қиз билан қўл ушлашиб чиқиб кетгани тасвирланган.
Кейинги эпизодда улар Қуддус шаҳридаги Ал-Ақсо масжиди томон юриб кета туриб: “Ифторлик Қуддусда бўлади, Фаластин пойтахти Қуддусга!”, - дея қўшиқ куйлашда давом этишади.
“Заин” ширкати 2000-йиллар охиридан бери кенг жамоатчиликка мўлжалланган телерекламалар таёрлаш билан шуғулланиб келади.
Ширкатнинг юқорида тасвирланган рекламаси АҚШ 14 май куни Исроилдаги ўз элчихонасини Тел Авив шаҳридан Қуддусга кўчириб, ушбу муқаддас шаҳар Исроил пойтахти эканини эълон қилганидан икки кун ўтиб, 16 май куни дунё юзини кўрди.
Мазкур рекламани биринчи куннинг ўзида бир миллиондан зиёд одам томоша қилди.