Лондон шаҳрида Рамазон чодирлари ташкил қилинди
Бир гуруҳ кўнгилли мусулмонлар Ислом тинчлик ва меҳр дини эканини кўрсатиш учун Рамазон ойида барча истаганлар, хусусан уйсизларга ифторликлар ташкил қилишди.
- Мазкур тадбиримиз Рамазон ойига бағишланган бўлиб, бу орқали баъзи одамларда шаклланиб қолган Ислом ҳақидаги салбий тасаввурларни инкор қилишни мақсад қилганмиз, - дейди ВВС билан бўлиб ўтган суҳбат чоғида Лондон университетининг Шарқ ва Африка факультетининг битирувчиси Умар Талҳа. - Ҳақиқат шуки, биз Лондон аҳолиси учун Рамазоний кайфиятда хизмат қилмоқдамиз".
Лондоннинг Блумсбери хиёбонига тикилган Рамазон чодирларида истаган одам ифторлик қилиши мумкин. Умар Талҳа 2011 йиллари ҳам шунга ўхшаш ифторликларни ўтказиш ташаббускорларидан бўлган. У аввалига ўз факультетининг талабалари учун ифторликлар қилиб берган. Ифторликлардан сўнг эса, уйсизларга текин таом улашиб чиққан эди.
Бу йил Талха ўз биродарлари билан бутун Рамазон мобайинида текин ифторликлар ташкил қилмоқчи. Ифторликлар учун эълонларни уйсизлар яшайдиган жойларда тарқатган. Хусусан, уйсизлар бошпана топган Сент-Манга уйсизлари шундай эълонларни кўришган. - Аввалига уйсиз лондонликлар ифторга келганида, улар уялганларидан ҳеч ким билан гаплашмаган. Сўнг эса, уларга оддий одамларга бўладиган муносабатда бўлаётганини кўришгач, хурсанд бўлдилар, - дейди Талха.