Украина президенти Қримга қўшин киритмаслигини маълум қилди
Расмий Киев Қрим мухторияти ҳудудига ўз қўшинларини киритиш ниятида эмас. Бу ҳақда Украина президенти вазифасини бажарувчи Александр Турчинов "Агенсе Франсе-Прессе"га берган интервюсида айтиб ўтди.
Турчиновнинг сўзларига кўра, агарда Киев Қримда ҳарбий амалиёт бошлашга қарор қилса, мамлакатнинг Россия билан ёндош бўлган шарқий чегаралари ҳимоясиз қолиб кетади. Унинг таъкидлашича, Россия аллақачон Украина билан чегарадош ҳудудларга танк бўлинмаларини келтириб қўйган ва қўшин киритишга шароит яратиб бериши учун Киевни гижгижламоқда. “Биз Кремл томонидан ишлаб чиқилган ссенарийга амал қилмоқчи эмасмиз, — деди Турчинов. — Лекин, борди-ю, Қрим ҳудудида Россия украин ҳарбийларига ҳужум қилса, у ҳолда қўшин шунга яраша жавоб беришига тўғри келади”.
Президент вазифасини бажарувчи Турчиновнинг афсус билдириб айтишича, Россия зиддиятни дипломатия йўли билан ҳал этишга ва ташқи сиёсий муассасалар даражасида музокара олиб боришга рози бўлмаяпти. Унингча, “АҚШ ва Евроиттифоқ Россияни Украинага нисбатан ҳарбий тажовузкорлик ва фитналарни бас қилишга мажбур этишлари лозим”.
Қримнинг мақоми белгиланадиган ва 16-март кунига режалаштирилган референдум ҳақида гапириб, Турчинов бу овоз беришни “сохта”, деб атади. Унинг фикрича, референдум Қримда эмас, балки Кремл кабинетларида бўлиб ўтади, Россия қуролли кучлари эса унинг натижаларини қалбакилаштиришади. Киев аввал ҳам Қримда ўтказиладиган референдумнинг конституцияга зид эканлигини таъкидлаган.
11-март куни Қрим парламенти мустақиллик декларациясини қабул қилди, Украина Ташқи ишлар вазирлиги эса буни конституцияга зид ва “юридик аҳамиятга эга эмас”, дея баҳолади. Расмий Москва бўлса мазкур декларацияни қонуний ҳамда асосланган, деб ҳисобламоқда. Шунингдек, Россия ҳануз Виктор Януковични қонуний президент санаб, Турчиновни ва умуман Украинанинг ҳозирги ҳукуматини тан олмай келаётир.