«Ўзбеккино» «Нуҳ» фильмининг Тошкентдаги намойишлари юзасидан расмий баёнот берди
«Ўзбеккино» миллий агентлиги Голливудда суратга олинган «Нуҳ» фильми юзасидан расмий баёнот берди. Баёнот матни 28 март, жума куни агентлик расмий сайтида эълон қилинди.
«Сўнгги кунларда баъзи оммавий ахборот воситаларида америкалик кинорежиссёр Даррен Аронофски тасвирга олган «Нуҳ» бадиий фильмининг Ўзбекистондаги айрим кинотеатрларда «Ўзбеккино» Миллий агентлиги билан келишмай намойиш этилаётгани тўғрисида хабарлар берилмоқда», – деб ёзади агентлик (Kun бу ҳақда 27 март куни хабар берган, 28 март куни эса намойишлар тўхтатилгани маълум бўлди).
Агентлик матбуот хизматининг маълум қилишича, ушбу масалага ойдинлик киритиш мақсадида «Ўзбеккино» миллий агентлигининг Лицензиялаш, аудиовизуал маҳсулотларни эксперт баҳолаш ва халқаро алоқаларни ривожлантириш бўлими бошлиғи Рустам Шарипов ахборот берган.
«Ўзбекистон Республикаси Вазирлар Маҳкамасининг 2004 йил 17 мартдаги 126-қарори билан тасдиқланган Низомга мувофиқ, «импорт ва экспорт қилинадиган кино ва видео маҳсулотларини эксперт баҳоси берилишини амалга ошириш, республика ҳудудида кино ва видеофильмларни кўрсатиш» ваколати «Ўзбеккино» миллий агентлиги зиммасига юклатилган. Чет элларда ишлаб чиқарилган ҳар қандай аудиовизуал маҳсулотни намойиш этиш учун тавсия «Ўзбеккино” миллий агентлигининг Бадиий кенгаши қошидаги таниқли киношунослар ва ушбу соҳага оид бошқа экспертлардан таркиб топган эксперт баҳолаш комиссияси хулосасига биноан берилади», – дейди Шарипов.
«Қайд этиш лозимки, шу кунгача тегишли лицензияга эга бўлган ҳеч бир юридик шахс «Ўзбеккино» Миллий агентлигига «Нуҳ» фильмини мамлакатимиз ҳудудларида намойиш этиш учун тавсия сўраб мурожаат қилмаган», – дейилади агентлик хабарида.
(Баъзи хабарларга кўра, бу фильмни намойиш қилиш учун диний қўмитанинг тавсияси ҳам бўлмаган - Инфо.Ислом.Уз)