Ғазодаги хунрезлик давом этмоқда
“Би-Би-Си” телеканали тарқатган маълумотларга кўра, Исроил ва Фаластин ўртасидаги 72 соатлик ўт очишни тўхтатиш келишуви кеча тунда якунланиши биланоқ, томонлар яна бир-бирларини ўққа тутишган.
“Би-Би-Си”нинг Исроил ҳарбийларига таяниб хабар беришича, Ғазодан учирилган бешта ракетага жавобан, Исроил авиацияси Сектордаги “террористик манзиллар”ни нишонга олган. Бироқ, жаҳонга машҳур “Би-Би-Си” телеканали Фаластиннинг бу борадаги фикри билан ҳозирча қизиқиб кўрмагани боис, кеча тунда ким биринчи бўлиб ўт очгани қоронғулигича қолмоқда.
Ҳафта бошида Миср пойтахти Қоҳирада бошланган Исроил-Фаластин музокараларининг кечаги, яъни, чоршанба кунги натижаси ўлароқ, томонлар ўт очишни тўхтатиш келишувининг амал қилиш муддатини яна беш кунга узайтиришга келишиб олганликлари ҳам хабар қилинмоқда.
“Энди бу келишувга томонлар қанчалик амал қилишлари номаълум”, – дейилади “Би-Би-Си” хабарида.