Эрдўған: “Янги Туркияга янги анъаналар керак!”
Туркиянинг янги сайланган Президенти Режеп Таййип Эрдўған ўзи раҳбарлик қилаётган “Адолат ва тараққиёт” партиясининг мажлисида иштирок этиб, “янги Туркия”га янги анъаналар кераклиги ҳақида гапирган ҳамда партия аъзоларини янада ҳушёр бўлишга чақирган.
Жумладан, Эрдўған ўз чиқишида Туркия давлат бошқарувининг анъанавий қоидаларини қайта кўриб чиқиш заруратига тўхталиб: “Менга Конституция томонидан берилган ваколатларнинг барчасидан фойдаланаман. Бугунга қадар ушбу ваколатлар тўлақонли ишлатилмай келарди... Улар буни анъана деб аташмоқда, лекин қанақа “анъана” ҳақида сўз бормоқда ўзи?!... Тарихда илк бор мамлакат президенти бевосита халқнинг ўзи томонидан сайланди ва шу тариқа, янги анъанага асос солинди. “Янги Туркия” янги анъаналарга эга бўлади ва айнан биз ўша янги анъаналарни шакллантирамиз?”, – деб таъкидлаган.
Шунингдек, Эрдўған ўз партиядошларини 2015 йилда мамлакат парламентига бўлиб ўтадиган сайловларга пухта тайёргарлик кўришга ва унда ғалаба қозонишга чақириб, партиянинг ғалабаси Конституцияни ўзгартириш учун зарур, деб эътироф этган.
Амалдаги қонунчиликка кўра, Туркия Конституциясига ўзгартириш ва қўшимчалар киритиш учун парламент аъзолари умумий овозининг учдан икки қисми талаб этилади. Ҳозирда “Адолат ва тараққиёт партияси” Буюк Миллат Мажлисида 313 та ўринга эга (жами ўринлар сони – 550 та).
Ўз нутқини якунлар экан, Эрдўған ўз издошларини уларнинг “бирдамлиги ва биродарлиги”га рахна солиши мумкин бўлган турли фитналарга нисбатан ҳушёр бўлишга ундаган.
Эслатиб ўтамиз, Режеп Таййип Эрдўған шу йил 10 август куни Туркия тарихида илк бор ўтказилган президентлик умумхалқ сайловида салкам 52 фоиз овоз тўплаб, сайловнинг биринчи босқичидаёқ ғалабани қўлга киритган эди. Президент инаугурацияси шу йил 28 августга белгиланган.