Бинғозий яна нотинч, ёхуд Қаддофийнинг “қайтган” генерали
“Reuters” ахборот агентлигининг тарқатган хабарларига кўра, Либиянинг Бинғозий шаҳрида генерал Халифа Ҳафтар ва ўзларини “Ансор ал-Шариат” деб атаётган қуролланган гуруҳ ўртасида отишмалар бўлиб ўтмоқда.
Келтирилаётган маълумотларга кўра, қуролли тўқнашув натижасида камида 5 киши ҳалок бўлган, 16 киши яраланган. Отишмаларда ҳарбий самолётларнинг иштирок этганлиги ҳам хабар қилинмоқда.
2011 йилда Либиянинг собиқ раҳбари Муаммар Қаддофий ағдарилганидан бери, мамлакатда, қатор оммавий ахборот воситалари таъкидлаётганларидек, “фуқаролик уруши” давом этмоқда.
Афсуски, ҳануз парокандалик исканжасида қолаётган Либия турли гуруҳларнинг жанг майдонига айланиб улгурди. Жумладан, мамлакатнинг “нефть маркази” ҳисобланадиган Бинғозийни юқорида қайд этилган кучлар тўлиқ эгаллашга уринаётган бўлсалар, мисраталик ва зинтонлик деб аталаётган жангарилар пойтахт – Тарабулус (Триполи)ни ўз ҳукмронлигига олиш учун ўзаро уруш қилмоқдалар. Марказий ҳокимият эса ҳали-бери жипслаштирувчи ягона кучга айлана олгани йўқ.
Шу кунларда, қўшни мамлакатлар Тунис ва Миср ҳам Либия билан ҳаво алоқаларини вақтинча тўхтатганликларини маълум қилишган.
Маълумот учун айтиб ўтамиз, генерал Халифа Ҳафтар 1943 йилда Либиянинг шарқидаги Аждабия шаҳрида туғилган бўлиб, Бинғозий ҳарбий академиясида, шунингдек собиқ Совет Иттифоқида таҳсил олган. Муаммар Қаддофий даврида олий ҳарбий лавозимларда ишлаган, бироқ 1980-йилларнинг охирида Либия-Чад урушидан кейин Қаддофий генерал Ҳафтарни қамоқ жазосига ҳукм этади. Кейинроқ, АҚШ ва Либия ўртасида бўлиб ўтган музокаралар натижасида, Ҳафтар АҚШга кетиши учун озод этилади. Йигирма йилча АҚШда истиқомат қилган генерал 2011 йилда Либияга қайтди ва Қаддофийнинг ағдарилиши йўлида хизмат қилди. 2014 йилнинг февраль ойида Халифа Ҳафтар ҳамда Либия парламенти ва ҳукумати ўртасида келиб чиққан низо сабабли, генерал яна қуролли тўқнашув йўлини тутди.