Туркияга келаётган сайёҳлар сони ортмоқда
Туркия Маданият ва туризм вазирининг таъкидлашича, мазкур мамлакатга келаётган хорижий сайёҳлар сони ўтган ойда 14 фоизга ортган. Хусусан, бу йил июль ойи давомида Туркияга 5,2 миллион нафар чет эллик туристлар келган. Уларнинг ярмидан кўпроғи Европа мамлакатларининг фуқаролари эканлиги айтилмоқда.
Туркияга келаётган сайёҳлар сонининг қўплиги бўйича Россия биринчи, Германия иккинчи ва Британияликлар учинчи ўринни эгалламоқдалар. Таъкидланишича, бундай кўрсаткичларга мамлакатда сайёҳлик соҳасида олиб борилаётган ижобий ўзгаришлар натижасида эришилмоқда.
БМТ рақамларига кўра, ўтган йили хорижий сайёҳларни жалб қилиш борасида Франция пешқадамлик қилган. Кейинги ўринларни мос равишда АҚШ, Хитой, Испания, Италия мамлакатлари эгаллаганлар. Мазкур рейтингда Туркия олтинчи ўринни ишғол қилган.