Яманда нефт қувурларини портлатишди
Тарқатилган хабарларга кўра, ўтган бир ҳафталик муддатнинг ўзида Яманда нефт қувурлари икки маротаба портлатиб юборилган. Жумладан, мамлакатнинг Мариб вилоятида ва Убайда водийсидаги йирик нефть қувурларига қабилавий қуролланган гуруҳ ва жангарилар томонидан ҳужум қилинган.
Ҳужум натижасида нефт қувурида йирик портлаш содир бўлган ва нефт узатиш тўхтатилган. Бу, ўз навбатида, Яманнинг Қизил денгиз соҳилидаги бир нечта нефт конларида қазиб олиш ишларининг тўхтатилишига ҳам олиб келган.
Таъкидланишича, Яманда бу каби ҳолатлар одат тусига кирган бўлиб, турли қуролланган гуруҳлар бундай қўпорувчилик ҳаракатлари орқали ўз талабларини илгари сурадилар. Натижада, Яман кунига ўртача 15 миллион АҚШ доллари миқдорида зарар кўришга мажбур бўлмоқда.
Қайд этилган қувурларни портлатишда мамлакатдаги исёнкор “Ҳоутий” ҳаракатининг иштироки бор-йўқлиги ҳақида ҳозирча маълумот йўқ.
Айтиб ўтамиз, Яманда кунига 300 минг баррель нефть қазиб олинади. Нефтдан тушадиган даромад давлат бюджетининг 70 фоизини ва экспортнинг 90 фоизини ташкил этади. Унинг ялпи ички маҳсулотдаги улуши эса – 30 фоиз.