Либерияда эбола эпидемияси кўламининг кенгайиши кутилмоқда
Жаҳон соғлиқни сақлаш ташкилотининг огоҳлантиришига кўра, Либерияда эбола эпидемияси кўламининг кескин равишда кенгайиши кутилмоқда. Хабарларда таъкидланишича, яқин уч ҳафта ичида вируснинг яна минглаб одамларга юқиш эҳтимоли жуда баланд.
Ҳозирга қадар Либерия эбола вирусидан энг кўп азият чекаётган мамлакат бўлиб, бу йилги эпидемия бошланганидан бери 1100 дан ортиқ киши ушбу хасталик туфайли ҳалок бўлган.
Эслатиб ўтамиз, Либериядан ташқари Ғарбий Африка минтақасида жойлашган Гвинея ва Сьерра-Леон ҳам эбола эпидемиясига чалинган. Бугунга қадар, мазкур вирус билан касалланганларнинг умумий сони салкам 4000 кишини, у сабабли ўлганлар эса 2000 кишидан ортиб кетди.
Турли халқаро ташкилотлар ва хорижий давлатларнинг уринишларига қарамай, эболани тўхтатишнинг ҳозирча имконияти бўлмаяпти.