Эрдоған: “Американи Колумб эмас, мусулмонлар кашф этган”
Куни кеча Лотин Америка мусулмон етакчиларининг Истанбул шаҳрида ўтказилган саммити ёпилиш маросимида чиқиш қиларкан, Туркия президенти Режеп Таййип Эрдоған, Американи Колумб эмас, мусулмонлар кашф этганини таъкидлаб ўтди. Президент Эрдоған ўз сўзларининг тасдиғи сифатида, жумладан, ўша Колумбнинг кундалик дафтарига мурожаат қилишни таклиф этди: “Мусулмон денгизчилари 1178 йилдаёқ Америка қирғоқларига етиб боришган. Христофор Колумб ўзининг кундалик дафтарига Куба оролидаги бир тепалик устида масжид бўлганлиги ҳақида ёзиб қўйган...”.
Шунингдек, Туркия раҳбари ўз нутқи давомида мустамлакачилик амалиётини кескин танқид остига олиб, жумладан: “...Одамларни қилич ёрдамида, куч ишлатиб динга киритиш Исломнинг таркибий қисми бўлмаган ҳеч қачон. Бизнинг динимиз эксплуатация воситаси ҳам бўлмаган ҳеч қачон... Олтини учун Американи, олмоси учун Африкани мустамлака қилган ўша кимсалар, бугунга келиб ўшандай жирканч режаларини нефти учун Яқин Шарқда ҳам амалга оширмоқдалар...”, – деб таъкидлаган.